მოქალაქეთა იმ ნაწილის რეაქციას, რომლებიც სოციალურ ქსელში სვამენ კითხვას, თუ რატომ არის ორი მუნიციპალიტეტის სიმბოლიკა ერთნაირი, ზუგდიდისა და ხობის საკრებულოებში პასუხობენ, რომ საქართველოს პარლამენტთან არსებული ჰერალდიკის სახელმწიფო არ ზღუდავს მუნიციპალიტეტებს, სიმბოლოებზე გამოიყენონ ერთნაირი დეტალები.
მის მსგავსად ფიქრობს ხობის მუნიციპალიტეტის საკრებულოს აპარატის უფროსი ლელა შამათავა. მისი ცნობით, კვართი მათ სიმბოლოებზე გამოსახულია 2010 წლიდან.
„თავიდან იყო საუბარი სხვადასხვა სიწმინდეზე. დასაბუთებული არგუმენტის შემდეგ, თუ რა კავშირი აქვს თითოეულ სიწმინდეს მუნიციპალიტეტთან, საბოლოოდ ჰერალდიკის სახელმწიფო საბჭოს რეკომენდაციით შეირჩა ღვთისმშობლის კვართი“, - გვითხრა ლელა შამათავამ.
როგორ მოხდა, რომ ღვთისმშობლის კვართი ორივე მუნიციპალიტეტის სიმბოლიკაზეა გამოსახული, საქართველოს პარლამენტთან არსებული ჰერალდიკის სახელმწიფო საბჭოს თავმჯდომარის მოადგილე მამუკა გონგაძე პასუხობს, რომ ზუსტად ეს დეტალი ასახავს იმ წინააღმდეგობას, რაც ზუგდიდსა და ხობს შორის არსებობს კვართის გამო.
„კვართზე თავიანთი პრეტენზიები აქვთ ხობსაც და ზუგდიდსაც. ის ორივეს თავისად მიაჩნია. კვართი ორივეგან არის გამოსახული, ოღონდ სხვადასხვანაირად. მაგალითად, ხობში ამბობენ, რომ მათი გადმოცემის მიხედვით, ეს სახელო შემდეგ მიაკერეს, ამიტომაც არის იქ ცალი სახელოთი გამოსახული. განსხვავება არის იმაშიც, რომ ხობის სიმბოლიკაზე კვართი ვერცხლისაა, ზუგდიდის-ოქროსი. საქართველოს სხვადასხვა მუნიციპალიტეტის სიმბოლოებზე ბევრგან არის ოქროს საწმისი, რაში. შესაძლებელია დეტალები ჰგავდეს ერთმანეთს, თუმცა ის სხვადასხვანაირად იკითხება. ამ შემთხვევაში კი ის, რომ კვართი არის გამოსახული ორივე მუნიციპალიტეტის სიმბოლოებზე, ზუსტად ასახავს იმ წინააღმდეგობას, რაც არსებობს კვართის გამო ზუგდიდსა და ხობს შორის“, - გვითხრა მამუკა გონგაძემ.
ღვთისმშობლის კვართი, რომელიც ორივე მუნიციპალიტეტის სიმბოლიკის მთავარი დეტალია, ინახება ზუგდიდის დადიანების სასახლეში. ზუსტი თარიღი და მარშრუტი ღვთისმშობლის კვართის საქართველოში მოხვედრის უცნობია. ერთ-ერთი ვერსიის თანახმად, სამოსელი ქართველთა ჯვრის მონასტრიდან, იერუსალიმიდან ოდიშის მთავრის, ლევან მეორე დადიანის დროს ჩამოიტანეს. ის 1923 წლამდე ხობის მონასტერში ინახებოდა.
კვართი არაერთხელ ყოფილა დავის საგანი ხობისა და ზუგდიდის სასულიერო პირებსადა მრევლში.
სხვადასხვა დროს, კვართის ერთი დღით ხობის ხარების დედათა მონასტერში გადატანას მოთხოვნას, დაპირისპირება მოჰყვა ზუგდიდისა და ცაიშის ხობისა და ფოთის ეპარქიებს შორის. კვართის ხობში გადატანის წინააღმდეგ ზუგდიდში საპროტესტო აქციები იმართებოდა და გროვდებოდა ხელმოწერები.
