საჯიჯაოში ტრადიციული მარულა გაიმართა

28 აგვისტოს ხობის მუნიციპალიტეტის სოფელ საჯიჯაოში ხუთ სოფელს შორის ტრადიციად ქცეული მარულა ჩატარდა.
მარულა საცხენოსნო შეჯიბრების ერთ-ერთი უძველესი ეროვნული სახეობაა, რომელიც საჯიჯაოში მარიამობის დღესასწაულზე შპს „რუკა მაპინგის“ ინიციატივით 11 წელიწადია იმართება. წელს შეჯიბრში ოცდაათმა მხედარმა მიიღო მონაწილეობა, რომელთაგან 3000 მეტრ გარბენში პირველი ადგილი ღირსეულად მოიპოვა მამუკა ქანთარიამ, მეორე ადგილზე გავიდა ვიტალი კაჭარავა, ხოლო მესამე ადგილზე - ბეჟან ქავთარაძე. 
ტრადიციულ მარულას ხობის მუნიციპალიტეტის გამგებელი გოჩა ქაჯაია დაესწრო. გამარჯვებულები დაჯილდოვდნენ სიგელებით და ფულადი საჩუქრებით. ღონისძიებაზე საჯიჯაოს მკვიდრს, ბერძნულ-რომაულ ჭიდაობაში მსოფლიო ჩემპიონს ჯონი ხეცურიანს შპს „რუკა მაპინგისგან“ საჩუქრად ფულადი თანხა 500 ლარი გადაეცა.