საქართველოს სახალხო არტისტი, შოთა რუსთაველის, იაკობ გოგებაშვილის, ნიკო ბერძენიშვილის, ექვთიმე თაყაიშვილის და ზაქარია ფალიაშვილის სახელობის პრემიების ლაურეატი; ანსამბლ ,,რუსთავის“ დამაარსებელი და სამხატვრო ხელმძღვანელი, ალბერტ შვაიცერის პრემიის ლაურეატი (ანსამბლ რუსთავთან ერთად). ის გახლავთ თბილისის სახელმწიფო კულტურის ინსტიტუტის კათედრის გამგე – პროფესორი, ასევე ქართული ხალხური სიმღერის საერთაშორისო ცენტრის ხელმძღვანელი. ქ. ხობის საპატიო მოქალაქე. ანზორ ერქომაიშვილი დაიბადა 1940 წელს ქალაქ ბათუმში. იგი 300 წლიანი მუსიკალური დინასტიის მეშვიდე თაობის წარმომადგენელია. ბაბუისგან, არტემ ერქომაიშვილისგან გენეტიკურად მიიღო ხალხური მუსიკალური კულტურის, მისი საშემსრულებლო ტრადიციების ღრმა ცოდნა. დაამთავრა თბილისის კონსერვატორია და 1961 წელს სხვებთან ერთად ჩამოაყალიბა ანსამბლი “გორდელა”, რომელიც 1968 წელს სოფიაში მსოფლიო ფესტივალის ლაურეატი გახდა. 1968 წელს მან ჩამოაყალიბა მსოფლიოში აწ უკვე სახელგანთქმული ანსამბლი ,,რუსთავი“, რომელსაც დღემდე ხელმძღვანელობს.1976 წელს, ჩამოაყალიბა და სათავეში ჩაუდგა ბიჭუნათა ანსამბლ ,,მართვეს“. ანსამბლში აღზრდილი თაობები დღეს უკვე ხელმძღვანელობენ სხვადასხვა ჯგუფებს. 40 წელია მუშაობს გრამოფონის ფირფიტების მოძიებასა და აღდგენაზე, მან მსოფლიოს სხვადასხვა არქივებში მოიძია და მიაკვლია 500-ზე მეტ ქართული ხალხური სიმღერის ფონო ჩანაწერს 1901-30 წლების ჩათვლით, რომლებიც გამოსცა ფირფიტების და კომპაქტ-დისკების სახით.
