სახელმწიფო რწმუნებული - გუბერნატორი ხობის მუნიციპალიტეტის გამგეობის წარმომადგენლებს შეხვდა


17 იანვარს, საქართველოს ადმინისტრაციულ-ტერიტორიულ ერთეულებში (აბაშის, ზუგდიდის, მარტვილის, მესტიის, სენაკის, ჩხოროწყუს, წალენჯიხისა და ხობის  მუნიციპალიტეტები და ქალაქი ფოთი) სახელმწიფო  რწმუნებული – გუბერნატორი ლევან შონია და  გუბერნატორის პირველი მოადგილე კობა ქანთარია ხობის მუნიციპალიტეტის გამგეობის წარმომადგენლებს შეხვდნენ. შეხვედრას ესწრებოდნენ: მუნიციპალიტეტის გამგებელი გოჩა ქაჯაია, მოადგილეები მახარე ჩოკორაია და ედიშერ ჯობავა, გამგეობის სამსახურების უფროსები და მუნიციპალიტეტის რწმუნებულები.

     შეხვედრისას ძირითადი აქცენტი გაკეთდა მუნიციპალიტეტის დასახლებებში არსებულ პრობლემებზე. რწმუნებულებისგან მიწოდებული ინფორმაციებიდან გამოიკვეთა პრობლემური საკითხები, რომელთაგან ძირითადი ნაწილი  ინფრასტრუქტურის, წყალმომარაგების, ბაღების რეაბილიტაციასა და ნაპირსამაგრ სამუშაოებზე მოდის. გუბერნატორმა რწმუნებულების მხრიდან დასმული საკითხების შესაძლო მოგვარების გზებზე  ისაუბრა. „ხობს დიდი პოტენციალი გააჩნია, რათა საკუთარი რესურსები წარმოაჩინოს და მოახდინოს ინვესტორების დაინტერესება.  ჩვენი მიზანია რწმუნებულების დახმარებით ერთობლივად გადავჭრათ ყველა ის საკითხი რაც მუნიციპალიტეტის დასახლებებში პრობლემატურია, შევინარჩუნოთ და გავამდიდროთ ის რესურსი რაც გაგვაჩნია, დავასაქმოთ რაც შეიძლება მეტი ადგილობრივი მოსახლე და შევქმნათ ყველა პირობა, რათა უკეთეს პირობებში მოუწიოს საზოგადოებას ცხოვრება. ჩვენ ყველა წამოჭრილ პრობლემას სახელმწიფო ხელისუფლებასთან ერთად  განვიხილავთ და გადაჭრის გზებსაც გამოვნახავთ“ - განაცხადა გუბერნატორმა.