🏥 მაღალტექნოლოგიური რადიოლოგია ხობში: ლევან ქავთარაძის სახელობის სამედიცინო ცენტრის სიახლე
ხობი. ლევან ქავთარაძის სახელობის სამედიცინო ცენტრში მაღალტექნოლოგიური რადიოლოგიური კვლევების განყოფილება გაიხსნა, რომელიც ულტრათანამედროვე აპარატურითაა აღჭურვილი. ეს სიახლე რეგიონის მოსახლეობას საშუალებას აძლევს, კომპიუტერული კვლევები და ზუსტი დიაგნოსტიკა ადგილზე, ქალაქიდან გაუსვლელად ჩაიტარონ.
პროექტი სახელმწიფო პროგრამა „აწარმოე საქართველოში“ თანადაფინანსებით განხორციელდა. რადიოლოგიური ბლოკის გახსნის ღონისძიებას ადგილობრივი ხელისუფლებისა და სამედიცინო სფეროს წარმომადგენლები დაესწრნენ.
დამფუძნებლის კომენტარი
როგორც ლევან ქავარაძის სახელობის სამედიცინო ცენტრის დამფუძნებელმა, ლევან ქავარაძემ აღნიშნა, კლინიკა ამ ეტაპზე საქართველოში პირველი ამბულატორული დაწესებულებაა, რომელიც ლაბორატორიულ კვლევებთან და ექოსკოპიასთან ერთად, ციფრული რენტგენის, კომპიუტერული ტომოგრაფიის და მაგნიტურ-რეზონანსული ტომოგრაფიის აპარატურით არის აღჭურვილი.
„ამ პროექტის განხორციელება შეუძლებელი იქნებოდა, მიუხედავად სწორი მენეჯმენტისა, რომ არა ის სწორი პოლიტიკა, რომელსაც ჩვენი ხელისუფლება ჯანდაცვის სფეროში 2013 წლიდან მოყოლებული ატარებს. ეს არის დიდი წინგადადგმული ნაბიჯი რეგიონისთვის,“ - განაცხადა ბატონმა ქავარაძემ.
დასავლეთ საქართველოს სამედიცინო ცენტრის ნეიროქირურგმა, იაკობ ცერცვაძემ, ახალი კლინიკის მნიშვნელობას გაუსვა ხაზი:
„თანამედროვე კლინიკის გახსნა რეგიონისთვის მნიშვნელოვანია. ეს ნიშნავს, რომ ელემენტარული მკურნალობისა და დიაგნოსტიკის ჩასატარებლად მოსახლეობას აღარ მოუწევს დიდ ქალაქებში და თუნდაც უცხოეთში წასვლა. ასევე, ეს ერთმნიშვნელოვნად ზოგავს ადგილობრივი რეგიონის მოსახლეობის ფინანსებსა და დროს.“
